快捷搜索:

【網議政事】昔責暴行今又玩激 「飯民」扮失憶

日前立法會審議《逃犯條例》修訂法案委員會搞到七國咁亂,成班「飯民」離位、衝擊、搶咪、拉扯、推撞、飛撲,爭以為睇錯格鬥場。但其實十年前,民主黨同公民黨曾經發表過聯合聲明,話不滿社民連3個議員「動粗干擾會議進程」、「傷害立法會的尊嚴」、「阻礙議會有秩序運作」,仲對此表示「非常遺憾」。唔少網民都返篇恥笑班「飯民」又中回力鏢,仲反問佢︰「點解唔譴責自己?」

鴿訟被回帶曾譴責同道

成日狙擊「飯民」「無敵神駒」仇思達前日又發功,facebook出篇《歷史在笑『民主派』》,貼民主黨同公民黨2009年譴責社民連聲明。原來當年仲係社民連立法會議員「長毛」梁國雄、黃毓民、陳偉業時任財爺曾俊華宣讀財政預算案時,走去掃跌曾俊華面,又想搶演辭,長毛仲用書掟中曾俊華。事隔兩日,民主黨同公民黨就出個聲明,批評呢3個人「動粗干擾會議進程」、「傷害立法會的尊嚴」、「阻礙議會有秩序運作」,仲建議立法會議事規則委會員討論事件,「防止此類破壞秩序的行為繼續發生」。

睇返日前班反對派議員行為,真係「動粗干擾會議進程」、「傷害立法會的尊嚴」、「阻礙議會有秩序運作」樣樣都中,仇思達就抵死地微調聲明,由譴責社民連變成譴責「泛民」,又真係完全使喎。

網民批無限搬龍門

唔少網民都恥笑呢班反口反到毫無羞恥心泛民。「Conan Ho」簡潔概括︰「回力鏢。」「Patrick Ng」話︰「哈......莫講話十年前,就算五年前事呢班×街都唔知搬幾多次龍門啦。」「Kenny Kwok」質問︰「人地()做就破壞秩序?自己做就伸張正義?」

「Debby Kong」狠批︰「呢班垃圾連雙重標准(準)都已經唔係,係完全冇標準,反正人地()做就係×街,佢地()做就係英雄,人地()做就係搞亂個議會,佢地()做就係為民主。」「Mandus Lau」看透世事咁話︰「戲子黎()姐()。」「Michael Wong」直情質疑︰「公民黨及民主黨成功消滅社民連並搶埋人家票?」唔怪得之唔想長毛選潛在新東補選啦。

「Yau Yau」就話︰「番(返)佢修改議事規則時大義凜然陳詞出黎()打面就!」呢句說話又幾有啟發性,香港文匯報記者真係睇,民主黨前主席、時任議員何俊仁當時話,對於有議員會議期間行為不檢「感到遺憾」,所以支持事務委員會同法案委員會主席有權趕走咁議員,「以免影響立法會尊嚴。」佢仲話,公眾對「會議能否有序、暢順地進行」有期望咁話。

公民黨主席、時任議員梁家傑都有發言,話佢個黨同廣大的市民一樣,「我們也很希望能夠保持議會的秩序,亦希望最低限度能夠保證,出席本會會議的政府官員及公眾均不會感到任何壓力,或人身安全受到任何威脅。」

學網民「Chung Ming Lam」話齋︰「(『飯民』今日)點解唔譴責自己。」 ■香港文匯報記者 甘瑜

讀文匯報PDF版面

您可能还会对下面的文章感兴趣: